Un dos principais obxectivos da protección radiolóxica consiste na protección dos traballadores expostos por motivos profesionais ás radiacións ionizantes, de forma tal que o número de persoas expostas e a probabilidade de que se produzan exposicións potenciais sexan o menores posibles e que as doses individuais resultantes de ditas exposicións tamén sexan as menores posibles e non excedan os límites de dose regulamentarios.

A vixilancia operacional dos traballadores expostos baséase nos seguintes principios:

• Avaliación previa das condicións laborais para determinar a natureza e magnitude do risco radiolóxico e asegurar a aplicación do principio de optimización. 
• Clasificación dos lugares de traballo en diferentes zonas tendo en conta a avaliación das doses anuais previstas, o risco de dispersión da contaminación e a probabilidade e magnitude de exposicións potenciais.
• Clasificación dos traballadores expostos en diferentes categorías segundo as súas condicións de traballo.
• Aplicación das normas e medidas de vixilancia e control relativas ás diferentes zonas e ás distintas categorías de traballadores expostos, incluída no seu caso a vixilancia individual.
• Vixilancia sanitaria. 

O titular da instalación debe establecer as medidas de protección aplicables para previr a exposición, en función dos riscos vinculados aos traballos que impliquen exposición ás radiacións ionizantes. Igualmente deberá informar aos seus traballadores expostos antes de iniciar a súa actividade sobre os riscos radiolóxicos asociados e as normas e procedementos de protección radiolóxica que deben adoptar. Tamén deberá proporcionarlles formación antes do inicio da actividade e periodicamente.

As doses recibidas polos traballadores expostos durante toda a vida laboral rexístranse no historial dosimétrico individual que se manterá debidamente actualizado e estará a disposición do propio traballador.