Unha vez utilizado nos reactores nucleares, o combustible nuclear almacénase nas piscinas das centrais nucleares para  o decaemento da súa actividade e o seu arrefriamento. Posteriormente, o combustible nuclear gastado pode ser almacenado en seco ata a súa xestión definitiva en contedores de almacenamento ou contedores de almacenamento e transporte, denominados estes últimos de dobre propósito.

Estes sistemas de almacenamento están compostos por un conxunto de elementos que garanten o almacenamento seguro do combustible gastado. O seu deseño baséase en garantir o cumprimento das funcións de seguridade establecidas que esixe a normativa: manter a subcriticidade e o confinamento  do material e evitar a súa degradación; a blindaxe da radiación gamma e neutrónica e a evacuación da calor residual orixinada pola actividade radioactiva.

Estes contedores constan dun vaso cilíndrico cun sistema de cerre hermético e no seu interior hai un bastidor onde se aloxan os elementos combustibles. Dependendo do tipo de combustible nuclear, o contedor pode almacenar entre 20 e 60 elementos.

Os elementos de combustible gastado que cumpren os requisitos establecidos na licenza do contedor (tempo de arrefriamento, queimado e grao de enriquecemento, entre outros parámetros) poden ser almacenados segundo un plan de carga revisado e aprobado.

A normativa vixente define os requisitos de seguridade nuclear e protección radiolóxica para o deseño de contedores de combustible gastado, establece o contido da documentación a presentar para a súa aprobación e garante a adecuada coordinación entre os titulares nas fases do deseño ou fabricación e de uso dos contedores, xa que os responsables poden ser diferentes en cada unha delas.

Para elaborar os informes preceptivos previstos para ditos procesos de licenciamento, o CSN segue a normativa propia, a do país de orixe da tecnoloxía e a normativa internacional aplicable, como a do Organismo Internacional de Enerxía Atómica (OIEA), en materia de almacenamento de combustible gastado e, en particular, de contedores de almacenamento de combustible gastado en seco.